සුව පියයුරු – දිවි විසිතුරු… පියයයුරු පිළිකාව ජයගනිමු

සුව පියයුරු – දිවි විසිතුරු… පියයයුරු පිළිකාව ජයගනිමු

කල්තියා හදුනාගතහොත් 90% පමණ පියයුරු පිලිකාව සුවපත් කළහැකි බවත් සිදුවන මරන ගණන අවම වන බවත් පර්යෙෂණ මගින් සනාථ කර ඇත

පියයුරු පිලිකා සීඝ්‍ර වර්ධනයක්

ලොවපුරා ක්‍රමයෙන් පියයුරු පිලිකා රෝගින් ප්‍රමාණයේ වැඩිවිමක් දක්නට ලැබේ. ශ්‍රී ලංකාවේ තත්වය බැලූවිට, ජාතික පිලිකා ලේඛණය (2010) අනුව පිලිකා රෝගීන් සියයකින් 82ක්ම පියයුරු පිලිකා වන අතර, වයස් අනුව සියලුම කාන්තාවන්ට වැලන්දෙන පිලිකා දෙස බැලූවිට 26.8%ක් ම සමන්විත වනුයේ පියයුරු පිලිකා වලින් බව වාර්තා වේ. ආර්තවහරණය වූ කාන්තාවන් අතර පියයුරු පිලිකා හඳුනාගැනීම සීඝ්‍ර වර්ධනයක් පෙන්වන අතර පෙරට වඩා කාන්තාවන්ගේ පිලිකා පිලිබන්දව දත්ත එකතු කිරීම දිරිමත් කර තිබීම, සංඛ්‍යා ලේඛණවල දක්නා මෙම වර්දනයට එක් හේතුවකි.නමුත් අන් වයස් කාණ්ඩවල ද පිලිකා ඇතිවීම පෙරට වඩා දක්නට ලැබීමට හේතු තවදුරටත් පර්යේෂණ මගින් සොයාගත යුතුව ඇත. වත්මනේ දක්නට ලැබෙන නවීනතම රෝග හදුනාගැනීමේ සහ ප්‍රතිකාර ක්‍රම නිසා 1989 සිට මේ වනතෙක් පියයුරු පිලිකා මරණ සංඛ්‍යාව අවම කරගැනීමට හැකි වී ඇත. පියයුරු පිලිකා වැඩි වශයෙන් දක්නට ලැබෙන්නේ කාන්තාවන් අතර වුව ද, පිරිමින් අතර පියයුරු පිලිකා තත්වය නම්, 833 කින් එක් අයෙකු වශයෙන් රෝග විනිශ්චය කර ඇත. ලෝකයේ කාන්තාවන් අතර බහුලතම පිලිකා වර්ගය පියයුරු පිලිකා වේ.මෙම පිලිකා වර්ගය එකිනෙකට වෙනස් සංයුතින් ගණනාවකින් සමන්විත අතර සැබෑ පිලිකාවක් නොවන ගැටිත්තක්ද (benign) විය හැකිය.

පියයුරු පිලිකා සදහා වූ අවදානම් සාධක

පියයුරු පිලිකා අවදානම ඔබේ වයස සමග වැඩිවේ. බොහොමයක් පිලිකා රෝග විනිශ්චය කරනු ලබන්නේ වයස අවුරුදු 50පසුව ය. අපගේ ජානමය පසුබිම ද පියයුරු පිලිකා වලට අපගේ ප්‍රවණතාවය කියාපායි. එනම්, BRCA1, BRCA2 යන ජාන වර්ග අපට ප්‍රවේණිගත ව ඇත්නම් අපට ඇති පියයුරු පිලිකා මෙන්ම ඩිම්බකෝශ පිලිකා වල ද අවදානම අධික වේ. තවද ඔබගේ ආර්තව චක්‍ර, දිගු වයස් කාලයක් පුරා ඇතිවිණි නම් එනම්, ඔබ අඩු වයසේ ම ආර්තවයට පත් වී අවුරුදු 55න් පසුව ආර්තවහරණය වූ කාන්තාවක් නම් ඔබගේ ශරීරයේ බොහෝ ක්‍රියාවන් සඳහා මෙම මුලුකාලය පුරාම estrogen නම් හෝමෝනයේ බලපානු ලබයි. එය කාන්තාවන්ගේ ශරීරයේ සියලුම පරිවෘතිය කාර්යයන් සඳහා දායක වන පටක වල ක්‍රියාකරමින් සෛල සංයුතිය වෙනස් කිරීමට හේතුවක් බව අධ්‍යනය කර ඇත. මෙසේ, පියයුරු පිලිකා අවදානම ද වැඩි කරනු ඇත. තවද, වරක් ඔබට පියයුරු පිලිකා වැළදුනේ නම් නැවතත් ඊට ගොදුරුවීමට ප්‍රවණතාවයක් පවතී. ඔබගේ පටක පරීක්ෂණය අනුව ඔබට පිලිකාවක් නොවන, නමුත් පිලිකා අවදානම් කලාපයේ වූ පියයුරු ගැටිති හටගත්තේ නම් ද මෙම අවදානම බැහැර කල නොහැකිය. පවුලේ රෝග ඉතිහාසය සමග පියයුරු පිලිකාවල සබඳතාවය ගැඹුරින් අධ්‍යනය කර ඇත. ලඟම පවුලේ, එනම් තමන්ගේම මව සහෝදරිය පියයුරු පිලිකාවට ගොදුරු වුණි නම්, එසේම ඔබගේ පවුලේ ලඟම නෑදෑ (පියා, සහෝදරයා) පිරිමියෙකුට වුව ද එම කලාතුරකින් සෑදෙන පියයුරු පිලිකාව වැලදුනි නම්, ඔබට ඇති අවදානම බැහැර කල නොහැකිය. නිදසුනක් ලෙස, ඔබගේ පවුලේ ලඟම කාන්තා ඥාතීන් එක් අයෙකු/දෙදෙනෙකුට පියයුරු පිලිකාවක් වැලඳුනි නම් ඔබට වැලඳීමට ඇති අවස්ථාව ඉහල යයි. ඇතම් විට ඔබේ ඥාතිවරිය පිලිකාවට ගොදුරු වූවාට වඩා අඩු වයසකදී ඔබට එය වැලඳීමට ඉඩක් ඇත.

ඇතැම් අවධානම් සාධක අපට පාලනය කල හැකි ඒවා වේ

ඇතැම් අවධානම් සාධක අපට පාලනය කල හැකි ඒවා වේ. ඔබ කය වෙහෙසා කරන වැඩ ප්‍රමාණය අවම නම් ඔබේ ශරීරයේ තැන්පත් වන මේද ප්‍රමාණය වැඩිය. මෙය ද වක්‍රාකාරයෙන් පියයුරු පිලිකා වැලඳෙන අවදානමට එකතු වේ. ආර්තවහරණයෙන් පසුව මෙම තත්වය වඩාත් බලපානු දැකිය හැකිය. ඔබට ආර්තවහරණයෙන් පසුව වසර 5 කට වඩා හෝමෝර්න ප්‍රතිකාර ලබාදී ඇති නම්, විශේෂයෙන්ම මෙය, ශරීරයේ ස්වභාවික තුලනය බිඳවැටීම තුළින් estrogen සහ progesterone යන හෝර්මෝන දෙවර්ගය ම ලබාදී නොමැති විටක නම් පියයුරු පිලිකා අවදානම වැඩි කරයි. ඔබගේ ප්‍රථම දරු උපත වයස අවුරුදු 30 ට පසුව සිදුවීම, ලදරුවාට මවුකිරි නොදීම, දසමස් සම්පුර්ණ බිලින්දෙක් බිහිකල නොහැකි වීම (එනම් දිගටම ගබ්සාවන් පමණක් සිදුවීම) යන කරුණු ද පියයුරු පිලිකා සමග සම්බන්දතාවක් දක්වන බවට තොරතුරු ඇත. කාන්තාවන්ගේ මත්ද්‍රව්‍ය මත්පැන් භාවිතය ද පියයුරු පිලිකා වලට අවදානමකි.

පියයුරු පිලිකාවක් සඳහා වන බහුල ම රෝග ලක්ෂණ

ලෝකයේ කාන්තාවන් අතර බහුලතම පිලිකා වර්ගය පියයුරු පිලිකා වේ.මෙම පිලිකා වර්ගය එකිනෙකට වෙනස් සංයුතින් ගණනාවකින් සමන්විත අතර සැබෑ පිලිකාවක් නොවන ගැටිත්තක්ද (benign) විය හැකිය. පියයුරු පිලිකාවක් සඳහා වන බහුල ම රෝග ලක්ෂණයක් වනුයේ අලුතින් හදුනා ගත් තද ගැටිත්තක් ය.මෙය අසමමිතික හැඩයක් මෙන්ම වේදනාවකින් තොර වේ නම් පිලිකාවක් වීමට වැඩි ඉඩක් ඇත. ඇත්තෙන්ම සායනිකව, වේදනාත්මක ගැටිති පිලිකා නොවන වෙනත් හේතු (ආසාදන තත්ව, තන්තු පටක වල අධික වර්ධනයෙන් හටගත් ගැටිති ) නිසා ඇතිවීම බහුලව දක්නට ලැබේ. නමුත් ඇතැම් පියයුරු පිලිකා ඇල්ලීමේදී වේදනාත්මක, මෘදු එමෙන්ම සමමිතික හැඩති (defined borders) හෝ රවුම් ගැටිති වීමට පුලුවනි. තවද, ගැටිත්තක් නොමැති ව මුලු පියයුරම හෝ කොටසක් ඉදිමීම, සමේ දොඩම් පොත්තක ආක්කාරයෙන් ඇතිවන සියුම් වල ගැසුනු ස්වභාවයන්, තන පුඩුව ඇතුලට එබී පැවතීම, තන පුඩුවෙන් කිරි නොවන වෙනත් පැහැයක ස්‍රාවයක් ගැලීම, සමේ රතු පැහැවීම, ඝනකම වැඩිවීම, සම ගැලවීම වැනි ලක්‍ෂණ ද දැකිය හැකි වේ. ඇතැම් විට පිලිකාව ඔබේ අත්යට පවතින වසා ගැටිති එමෙන්ම කලාතුරකින් ඔබේ ගෙල පෙදෙසේ වසා ගැටිති වලට ද ව්යාප්ත වී ඒවා ඉදිමීම දක්නට ඇත. මෙහිදී සැලකිය යුතු වන්නේ, ඇතමුන්ගේ මෙම වසා ගැටිති ඉදිමීම පියයුරේ ගැටිති ඇතිවීමටත් පෙර සිටම නිරීක්‍ෂණය වීමට ලැබීමයි. මෙනිසා ඔබට මෙවැනි අසාමාන්‍ය වසා ගැටිති නිරීක්ෂණය වේ නම් වඩාත් උචිත වන්නේ වෛද්‍යවරයෙකු මගින් ඔබේ ගැටිති පරීක්ෂාකර ගැනීමයි. නමුත් මෙවැනි සෑම විටකදී ම වසා ගැටිති ඉදිමුම ඔබට පියයුරු පිලිකාවක් ඇති බවට සහතික නොකරන බව ද තරයේ මතක තබාගත යුතු වේ.

පියයුරු පිලිකා සඳහා වූ ප්‍රතිකාර ක්‍රම

පියයුරු පිලිකා සඳහා වූ ප්‍රතිකාර ක්‍රම රෝගියාගෙන් රෝගියාට වෙනස් වේ. තවද, ඔබේ ශල්‍යවෛද්යවරයා, පිලිකා විශේෂඥවරයා, පටක විශේෂඥවරයා, හෙද සත්කාර යන සියලු අයගේ සාමූහික ප්‍රයත්නය අනුව තීරණය වේ. පියයුරේ සැත්කම සහ ඉන් අනතුරුව විකිරණ ප්‍රතිකාරය, පිලිකා නාශක බෙහෙත් වර්ග මෙන්ම, ඇතමුන්ට යොදාගැනෙන සැත්කම් රහිත වූ වේදනා තොරකිරීමේ ප්‍රතිකාරය, යනාදිය අතරින් ඔබට සුදුසු ම ක්‍රමය එම විශේෂඥ මණ්ඩලය මගින් තීරණය කරනු ඇත. තරුණ කාන්තාවන් සඳහා පියයුරේ ස්වරූපය ආරක්ශා කරගනිමින් සැත්කම සිදුකිරීමට නවීන විද්‍යාවේ පහසුකම් සලසා ඇත. (breast conservation surgery) .එසේම පියයුරේ හැඩයටම කෘතිමව සැකසූ උපකරණ (breast implants) යොදාගැනීමට පුලුවනි. තවද ඔබේම මාංශපේශියක් භාවිතයෙන් ශල්‍යකර්මය අතරතුරදී හෝ පසුව බද්ධ කිරීමෙන් පියයුරේ හැඩය ආරක්ශා කිරීමට ද නවීන ක්‍රම පවතී.

පියයුරු පිලිකාව වැලඳීමෙන් පසු ප්‍රතිකාර ලබා සුවවන බව

නවීන වෛද්‍ය විද්‍යා දියුණුවත් සමග ඔබට ගැලපෙන ප්‍රතිකාර ක්‍රමය වෙත නොපමාව යොමුවීමට දැන් අවස්තාව ඇත. 90%පමණ පියයුරු පිලිකාව වැලඳීමෙන් පසු ප්‍රතිකාර ලබා සුවවන බවත් තවදුරටත් පියයුරු පිලිකා නිසා සිදුවන මරන සංඛ්‍යාව අවම බවත් පර්යෙෂණ මගින් සනාථ කර ඇත. ඔබගේ දැනුවත් වීම අන් අයෙක්ගේ යහපත වෙනුවෙන් ද භාවිත කරන්නේ නම්, නොසැලකිලිමත්බව නිසා මෙම පිලිකාව පැතිරීමෙන් අපගේ සිරුරේ අක්මාව වැනි වෙනත් අවයව වලට හානි සිදුවීම ද (සමස්තයක් ලෙස, මරන සංඛ්‍යාව ) අවම කරගත හැකිවේ. නවතම පිලිකා නාෂක ඖෂධ (අතුරු ආබාධ අවම ) පිලිබඳ පර්යේෂණ රැසක් මේ වනවිටත් සිදු කෙරෙමින් පැවතීම ද අප සැමගේ බලාපොරොත්තු දල්වයි. මේ නිසා ඔබ තවදුරටත් පියයුරු පිලිකා නිසා කනස්සලු වීමට හේතු අවමය.

ඔබ විසින්ම ස්‌වයං පියයුරු පරීක්ෂාව – වෙනසක් ඇතිවූ විගස හඳුන ගැනීමට

ඔබ විසින්ම ස්‌වයං පියයුරු පරීක්ෂාවේ යෙදීම වැදගත් පියවරකි. මෙමගින්, ඔබේ පියයුරු වල සාමාන්ය සංයුතිය කුමක්දැයි පහසුවෙන් වටහා ගැනීමටත් වෙනසක් ඇතිවූ විට හඳුන ගැනීමටත් හැකිවේ. ඇත්තෙන්ම මෙය මාසිකව සිදු කිරීම ඔබට පුරුද්දක් කරගත හැකිය. ඔබ ආර්තවහරණය වූ කාන්තාවක් නම් සෑම මසකම එක් නියමිත දිනක් මේ සඳහා වෙන් කරගන්න. එසේත් නැත්නම් මාසික ඔසප් දින කිහිපය මගහැර (එනම්, ඔසප් ආරම්භ වීමෙන් දින 4කින් පමණ පසුව, පියයුරු වල මද වේදනා ගතිය නැතිව යනවිට ) ඔබ ස්වයං පරික්ශාව සිදුකිරීම සුදුසුය. ඔබ ස්නානය කරන විටක දී, උඩුකය සම්පුර්ණයෙන් පෙනෙන කණ්නාඩියක් ඉදිරිපිට සිටගෙන ස්වයං පරීක්ශාව අරඹන්න. පියවර 1 ඔබේ අත් ඉන මත තබා, උරහිස් සෘජුව තබා, කණ්නාඩියක් ඉදිරිපිට සිටගෙන පරීක්ශා කරන්න. මෙසේ ඔබගේ පියයුරු වල සමමිතික බව, එකකට සාපේක්ශව අනෙකේ ප්‍රමානයේ වෙනසක, පැහැය, ඉදිමුමක් යනාදිය තිබේදැයි ඔබ නිරීක්‍ෂණය කරන්න. තවද, ඇතුලට නෙරා ගිය තන පුඩු, සම වල ගැසීමක් හෝ පැහැය වෙනසක් වුවද ඔබට වෛද්‍යවරයෙකු වෙත යොමුවීමට හේතුවක් වේ. ඇතැම් විට ඔබේ තන පුඩුව මත ආසාත්මිකතාවයක් හෝ තුවාලයක් වැනි වෙනසක් වුව ද තිබීම අවධානය කල යුතු කරුනකි. පියවර 2 ඔබේ දෑත් එසවූ විට ඉහත වෙනස්කම් ම නැවතත් වඩා හොඳින් නිරීක්‍ෂණය කල හැකිවේ. පියවර 3 තනපුඩුවේ ස්‍රාවයක්, පැහැයක් ඇත් දයි මෙහිදී නිරීක්‍ෂණය කරන්න. පියවර 4 ඔබ ඇඳ මත හාන්සි වී ඔබේ වම් පියයුර පරීක්ෂා කිරීම සඳහා දකුණු අත භාවිත කරන්න. මදක් ඇතුලට තෙරපමින් අතේ ඇඟිලි තුඩු පමණක් උපයෝගී කරගෙන වක්‍රාකාරයෙන් මුලු පියයුර වටාම කොටස් 4ක් පමන වනසේ පරීක්ශා කරන්න. ඔබට දකුණුපස සිට වම්පසට ලෙස ක්‍රමයෙන් පියයුර වටා ගමන් කර අවසානයේ තන පුඩුව මෙන්ම ඔබේ අත සහ උරහිස සම්බන්ද වන කොටස ද ඇතුලුව පරීක්ශා කරන්න. ඔබට පහසු පිලිවෙලකට මෙය සිදු කල හැකිය. උඩ සිට පහලට කොටස් වශයෙන් වුවද සුදුසුය.විවිද පීඩන ප්‍රමාණයන් යොදා ගනිමින් ද මෙය අත් හදා බලන්න. එනම් තන පුඩු වලට ඉතා ආසන්නයේ තෙරපන විට තරමක් අඩු පීඩනයක් මෙන්ම පියයුරේ ඈතින් ඇති කොටස් වලට යනවිට තරමක් වැඩි පීඩනයක් (ඔබට ඉල ඇට දැනෙන පරිදි) යොදන්න. වඩාත් වැදගත් වන්නේ ඔබ මුලු පියයුර ම පරීක්ශා කර තිබීමයි.

මැමෝග්‍රම් – නිරෝගී කාන්තාවන්ගේ පියයුරු පරීක්ශාවට

වෛද්‍යවරු විසින් තවදුරටත් යොදා ගන්නා එක් පරීක්ශණයකි, මැමෝග්‍රම්.මෙය පියයුරේ තරමක් විස්තරාත්මක x-ray පරීක්ශනයක් වැනි වූ, නිරෝගී කාන්තාවන්ගේ පියයුරු පරීක්ශාවට ද පිලිකා සඳහා අවදානම් දැයි බැලීමට යොදා ගැනේ. මෙය යොදා ගැනීම මගින් පියයුරු පිලිකා මරන ප්‍රමාණයන් අඩු කල හැකි බව සොයාගෙන ඇත. වයස අවුරුදු 40 සිට 44 දක්වා කාන්තාවන් තමාගේ කැමත්ත අනුව මැමෝග්‍රම් පරීක්‍ෂණය වාර්ශිකව කරගැනීමට අවස්ථාව ඇතැම් රටවල සපයාදී ඇත. වයස අවුරුදු 55ට වැඩි කාන්තාවන් සඳහා වාර්ශිකව හෝ වසර 2ට වතාවක් බැගින් මෙම පරීක්ශාව සිදු කල යුතු බව ද සොයාගෙන ඇත. මේද පටකයට සාපේක්ෂව තරමක් පියයුරු පටක වැඩිපුර පැවතීම ද ඔබ මැමෝග්රම් පරීක්ශනයට සහභාගී වීමේදී ඔබට යම් අවාසි සහගත තත්වයක් ඇතිකරවයි. එනම්,මෙහිදී මුල්ම අවදියේදී පියයුරු පිලිකා මගහැරීමෙන, හඳුනාගැනීමට නොහැකි වීමට අවස්ථාවක් පවතී. නමුත් වෙනත් පරීක්ෂණ සමග මැමෝග්රම් පරීක්ෂණය යොදාගැනෙන බැවින් ඔබට ගැටලුවක් නොවනු ඇත. සෑම කාන්තාවක්ම මෙම මැමෝග්‍රම් පරීක්ශාව ඔබගේ පියයුරු පරීක්ශාවට යොදාගැනීම පිළිබඳව ඔබට ඇති ප්‍රයෝජන, අවාසි, ගැටලු සහගත තැන් යනාදිය පිලිබඳ දැනුවත් වීම අගනේ ය. එසේම මුල් අවදියේ දී පිලිකාවක් හඳුනා ගැනීම තුල, නවීන ප්‍රතිකාර මගින් සුව කල හැකිවනු ඇත.


Dr. Asheni Shelika
MBBS (Sri Lanka)